އިންތިޤާލީ އިންސާފުގެ ޤާނޫނުގެ މައިގަނޑު މަޤްޞަދުތަކުގެ ތެރޭގައި، ޑިމޮކްރެޓިކް ވެރިކަމުގެ ނިޒާމު ހަރުދަނާކުރުމުގެ ގޮތުން އަނިޔާވެރިކަމުގެ ސަޤާފަތް ނައްތާލައި، ޤާނޫނުގެ ވެރިކަން ދެމެހެއްޓުން ހިމެނެއެވެ.

އޯޓީޖޭގެ އިޚްތިޞާސްގެ ތެރޭގައި ހިމެނެނީ 01 ޖަނަވަރީ 1953 ން 17 ނޮވެންބަރު 2018 އާ ދެމެދު، ދައުލަތުގެ މުއައްސަސާއަކުން ނުވަތަ މުއައްސަސާއެއް އިސް ހިންގުންތެރިއަކު، އިންސާނީ ޙައްޤުތަކާއި އަސާސީ މިނިވަންކަމާ ޚިލާފަށް ހިންގާފައިވާ ޢަމަލުތަކާ ގުޅޭ މައްސަލަތަކެވެ. މީގެ އިތުރުން، އޯޓީޖޭ އިން ބަލަމުންދާ މައްސަލައެއްގައި ޖިނާއީ ތުހުމަތެއް އެކުލެވޭނަމަ، އެފަދަ މައްސަލަތައް ބެލުމުގެ ބާރުވެސް ލިބިގެންވެއެވެ.

އޯޓީޖޭ އިން ތަޙްޤީގުކުރާ މައްސަލައެއްގައި ހިމެނޭ ޖިނާއީ ބައިތަކުގެ ތަހްޤީގު ފުރިހަމަވުމާއެކު، ދަޢުވާ ކުރުމަށް އެކަށީގެންވާ ހެކި ހުރިނަމަ، އެފަދަ މައްސަލަތަކުގައި ދަޢުވާކުރުމަށްޓަކައި ޕްރޮސިކިއުޓަރ ޖެނެރަލް އޮފީހަށް ފޮނުވޭނެއެވެ. އަދި މަދަނީ ގެއްލުމުގެ ބަދަލު ހޯދުމަށާއި މުދަލާއި ފައިސާ އަނބުރާ ހޯދުމުގެ މައްސަލަތަކުގައި ފިޔަވަޅު އެޅުމަށް ބަންޑާރަ ނައިބުގެ އޮފީހަށް ފޮނުވޭނެއެވެ. އެހެންނަމަވެސް މިގޮތަށް ދައުވާކުރުމަށް ފޮނުވުމުގެ ކުރިން ދެފަރާތް ވާހަކަ ދައްކައިގެން ސުލްޙަކުރެވެން ހުރި އެންމެހައި ގޮތްތައް ހޯދައި ސުލްޙަކުރުވުމަށް އޯޓީޖޭ އިން މަސައްކަތް ކުރާނެއެވެ.

އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން ކުރިއަށްގެންދާ ތަޙުޤީޤުތަކުން 1953 އާއި 2018 ވަނަ އަހަރާ ދެމެދު ހިންގާފައިވާ އިންސާނީ ޙައްޤުތަކާ ޚިލާފު ޢަމަލުތަކުގެ ޙަޤީޤަތާ ހަމައަށް ވާސިލްވުމަށް އެހީތެރިވެދޭނެއެވެ.

މިގޮތުން ހަޤީގަތަށް ވާސިލުވުމުގައި އަނިޔާ ލިބުނު ފަރާތްތަކާއި ހެކިންގެ ބަޔާން ނެގުމާއި، މައްސަލަތައް ދިރާސާކޮށް އިންސާނީ ހަޢްގެއް ނިގުޅައިފައިވޭތޯ ބެލުމާއި އެމައްސަލަަތަކުގެ ސަބަބާއި އެއިން ނިކުތް ނަތީޖާ ބެލުމާއި، އާންމުކޮށް ހުޅުވާލައިގެން އަޑު އެހުންތައް ބޭއްވުމާއި އެހެނިހެން ހޭލުންތެރި ޕްރޮގްރާމްތައް ބޭއްވުމާއި މައްސަލަތަކާއި ގުޅިގެން އެމައްސަލައެއްގައި ފާހަގަވި ކަންކަމާއި އަޅަންޖެހޭ ކަމަށް ފެންނަ ފިޔަވަޅުތަކުގެ ފައިނަލް ރިޕޯޓް ތައްޔާރުކޮށް ނެރުން ހިމެނެއެވެ.

މީގެ އިތުރުން، އޯޓީޖޭ އިން މަަސައްކަތްކުރަނީ ކުރިން ހިންގާފައިވާ ޢަމަލެއްގެ ސަބަބުން އިންސާނީ ހައްޤެއް ނިގުޅައިގެންފައިކަމަށް ބެލެވޭ މައްސަލަތަކުގެ ހަޤީގަތް ހޯދުމަށާއި، މިފަދަ މައްސަލަތަކުގައި އެންމެ އެކަށީގެންވާ ޙައްލު އެފަރާތްތަކަށް ހޯދައި ދިނުމަށެވެ. މިގޮތުން މާއްދީ ގޮތުންނާއި ރަމްޒީ ގޮތުން ލިބުނު ގެއްލުމުގެ ބަދަލު ނަގައި ދިނުމާއި ހަނދާނީ ބިނާތަކާއި މިއުޒިއަމްތައް ބިނާކުރުން ހިމެނެއެވެ.

އަނިޔާ ލިބިފައިވާ ފަރާތްތަކާއި އަނިޔާދިން ފަރާތްތަކާ ދެމެދު ޞުލްޙަ އާއި ހަމަޖެހުން ޤާއިމުކުރުމަކީ މި އޮފީހުގެ އެންމެ މުހިންމު އަދި ގޮންޖެހުން ބޮޑު މަސައްކަތަށް ވެގެންދާނެއެވެ. މި މަސައްކަތް ފެށިގެން އަންނަނީ އުދަނގޫ އަދި ސިޔާސީ މާޙައުލެއްގައި އަނިޔާ ލިބުނު ފަރާތާއި އަނިޔާދިން ފަރާތަކީ ކޮބައިކަން ދެނެގަތުމަށްފަހުގައެވެ. އަދި އަނިޔާ ދިން ފަރާތާއި އަނިޔާ ލިބުނު ފަރާތާ ދެމެދު ޞުލްޙަ ޤާޢިމުކުރުމުގެ މަސައްކަތް މި ނިޒާމުގެ ތެރެއިން ކުރެވިގެންދާނެއެވެ.